2 Raja-raja 5

Iatu Naaman, kamandang lompona datu Aram, iamo misa’ to napakala’bi’ tongan puangna, sia mandu dipakaraya, belanna tete dio kalena anNa pa’kamaseanni PUANG tu kapataloan lako to Aram. Iatu tau iate, iamo misa’ to lalong, apa golenan.

Den pissan denmi ba’tu pirang-pirang tuntunan to Aram tassu’ la lao mangrampa, narampami dio mai tondok to Israel tu misa’ pia baine mangura; iate baine iate napotomengkarang bainena Naaman.

Nakuami lako puangna baine: Iakenna la dio olona nabi dio Samaria tu puangku, la napamondo tu sakinna puangku.

Malemi tu Naaman umparampoi tu kada iato lako puangna, nakua: Susito sia susite tu kada napokada tu pia baine dio mai tondok Israel.

Ma’kadami tu datu Aram nakua: Malemoko, la kupa’peammo sura’ tu datu to Israel. Malemi nabaai tu salaka sangpulo talenta, sia annan sa’bunna sikele’ bulaan sia sangpulo lamba’na pakean mala’bi’.

Naparampomi tu sura’ lako datu to Israel, nakua: Ianna rampo te sura’ lako kalemi, la miissan kumua ussuanna’ Naaman taungku mati’, ammi pamondoi tu golenna.

Iatonna mangkamo datu to Israel umbasai tu sura’, nase’bu-se’bumi tu tamangkalena, anna ma’kada nakua: Puang Matuara’kate, angku ma’dinra ma’pamate sia ma’patuo, na urunganni te tau iate umparampo kada lako kaleku, kumua la umpamondona’ golenna misa’ tau? Tiromi, manassamo kumua undaka’mo posanga la ungkadakeina’.

Iatonna rangii Elisa, taunNa Puang Matua, tu diona datu to Israel usse’bu-se’bu pakeanna, nasuami tu pesua lako datu, nakua: Ma’apai ammi se’bu-se’bui tu tamangkalemi? Melo ke saei lako kaleku tu tau iato, anna issanni, kumua den nabi dio lu to Israel.

Pakalan saemi tu Naaman sola mintu’ darangna sia karetana, anna tadang dio to ba’ba banuanna Elisa.

Nasuami Elisa tu misa’ pesua umpokadanni nakua: Malemokomi, mimendio’ pempitu diong salu Yordan, namondo sule tu kalemi sia la maserokomi.

Malemi tu Naaman nakabu’ kasengkeanna anna ma’kada nakua: Tonganna kusanga lan penaangku, kumua: Manassa la tassu’ lako salian nabendan dio sia ussa’bu’ sanganNa PUANG, Kapenombanna, anna sapu-sapui limanna tu naninna mapa’di’ na iake susito mondomi tu golen.

Iatu Abana sola Parpar, salu Damsyik tae’raka namandu melo na iatu mintu’ uai dio Israel? Tae’raka kuma’din mendio’ diong sia masero sule? Memboko’mi male re’dek ara’na.

Apa attu iato saemi tu mai to mase’ponna urreke’i, anna ma’kada lako, nakua: O ambe’, ianna den misa’ apa masussa napasanangkomi tu nabi, umba mikua tang la umpogau’i? Ondong polepi totemo nakuan mannakomi: Mendio’komi ammi mondo sule?

Iamoto malemi rokko sia unnukkun pempitu diong salu Yordan, susitu kadanna taunNa Puang Matua; mondomi sule tu kalena susito kalena misa’ pia mangura sia maseromo.

Mangkato sulemi lako taunNa Puang Matua la ia la mintu’ to unturu’i. Iatonna rampomo, bendanmi dio tingayona sia ma’kada nakua: Tonganna, totemo kutandaimo, kumua lan mintu’ lino tae’ Puang Matua sangadinna dio manna lu bangsa Israel. Tarimami te pa’kamasean dio mai taummi.

Apa nakua Elisa: La lelukraka tuoNa PUANG, tu kupengkaolai, inang tae’ kula unnalai. Moi nanaran-naran kumua anna alai, apa inang natampun.

Nakuami Naaman: Ianna tae’ mitarimai te, kupalaku mibenni taummi tu litak silasanna nabaa sangayoka bagala’, belanna iatu taummi, tae’mo nala umpemalaran pemala’ ditunu pu’pu’ ba’tu pemala’ pangrere’ – lako kapenomban senga’, sangadinna lako mannamo PUANG.

Apa ke ma’dinni tu diona apa iate Napagarri’i PUANG tu taummi; to ke tamai inan pemalaran Rimon tu puangku la menomba, ke sissarei dio takia’ku, kuurunganni umpaula’i tukku menomba lan inan pemalaran Rimon; iangku tukku menomba lan inan pemalaran Rimon, ke ma’dinni Napagarri’i PUANG tu taummi tu diona apa iate.

Nakuami tu Elisa lako: Male marampa’mokomi. Apa iatonna sanglengko lalanmo naolai,

ma’tangnga’mi tu Gehazi, taunna Elisa, taunNa Puang Matua: Nakatirinnai puangku tu Naaman, to Aram iate, natae’ naalai tu apa-apa nabaa! La lelukraka tuoNa PUANG, inang la ma’dondona’ unnula’i, angku alai tu apa dio mai kalena.

Iamoto malemi tu Gehazi unnula’ Naaman. Iatonna tiromi Naaman, kumua den tau undi unnula’i, mekkondongmi dao mai karetana untammui sia ma’kada nakua: Malaga’-laga’ siaraka?

Mebalimi nakua: Malaga’-laga’ sia. Nasuana’ puangku umpokadangkomi nakua: Mane ina’ nasae tu da’dua pia muane, iamo passikola nabi dio mai buntu Efraim. La miben dikka’ salaka sangtalenta sia pakean mala’bi’ duang lamba’ sola duai.

Nakuami Naaman: Melomi to, alami da’dua talenta. Nanaran-naranmi, anna suai umpatamai kandu’ da’dua tu salaka da’dua talenta sia pakean mala’bi’ duang lamba’, nabenni kaunanna da’dua, dolo umbullei.

Iatonna rampomo tu Gehazi lako tanete iato, naalami tu kandu’ dio mai tu kaunan sola duai, nanannai lan banuanna, nasuai male tu tau sola duai. Malemi tu tau iato.

Mangkato tamami tu Gehazi sia bendan la mennolo lako puangna. Nakuami tu Elisa lako: E Gehazi, umbara munii sule? Mebalimi nakua: Tae’ra namale-male tu taummi.

Apa nakua tu Elisa lako: Tae’raka naula’ko penaangku, tonna messaile tu tau sia mengkalao dao mai karetana untammuiko. Attu iarakate tu sipatu dinii unnala salaka iato, ba’tu unnala pakean, ba’tu garonto’ saitun sia pa’lak anggoro’ sia domba sia sapi sia kaunan muane sia kaunan baine?

Iamoto, iatu golenna Naaman la le’ke’ lako kalemu sia lako ampo bati’mu sae lakona. Iatonna soro’mo tu Gehazi dio mai kalena, golenanmi, mabusa susi ambun makko.